བསང་ཆུའི་ཞིང་གྲོང་ལོ་སར་དགོང་ཚོགས་ལ་བལྟས་རྗེས་ཀྱི་འཆར་སྣང་།

གཞན་ཡང་གཞོན་སྐྱེས་གླུ་མ་དཀའ་ཐུབ་འཚོ་དང་སྐལ་བཟང་མཚོ་མོ། འཕགས་མོ་སྐྱིད་སོགས་ཀྱིས་མཉམ་ལེན་བྱས་པའི་《གནས་མཆོག་རྒན་གྱ།》 《ཨ་མྱེས་གང་སྔོན་གྱི་མཁའ་དབྱིངས།》《རྨི་ལམ》ཞེས་པར་ཡུལ་སྐད་དང་མཐུན་པའི་དག་གསལ་གྱི་འགྲེལ་བརྗོད་དང་རྣ་བའི་བཅུད་དུ་འཇེབས་པའི་དྲུག་འགྱུར་དབྱངས་རྟ། རྩེད་མཚར་ཡིད་དུ་འོང་བའི་གར་ཉམས་བཅས་ལྡན་པས། ཀུན་གྱིས་མགྲིན་པ་གཟེངས་སུ་བཏེགས་ནས་བསྔགས་བརྗོད་སྦམ་མཐོ་བ་མཛད། 

ཕུལ་བྱུང་གཞོན་སྐྱེས་གླུ་བ་ཐོ་རེངས་དང་རྡོ་རྗེ་འཚོ། དགེ་བྷ། འཇིགས་བྱེད། ཚེ་དབང་རིག་འཛིན་སོགས་ཀྱིས་བླངས་པའི་དམངས་གླུ་བདེ་སྐྱིད་ཀྱི་གཡང་ཁྱིམ་ཞེས་པར་དབྱངས་ཀྱི་འགྱུར་ཁུགས་ངོ་མཚར་ཆེ་ལ་སྙན་འཇེབས་ལྡན་པའི་ཐོག་ཚིག་གི་ནང་དོན་ནི་གསོན་ཉམས་ལྡན་པས་ཡིད་དབང་འགུགས་པའི་ནུས་པ་ལྡན་ནོ།

བླ་བྲང་ཕུག་སྡེ་སྡེ་བའི་གཞོན་སྐྱེས་གར་མཁན་ཚོས་བོད་རང་གི་དམངས་ཁྲོད་ཀྱི་གར་ཤ་ཡུ་མོ་ཤེའུ་ཞེས་པར་གནའ་གར་གྱི་ཉམས་འགྱུར་རྨད་དུ་བྱུང་ཞིང་། ཡིད་བརྟན་འཕྲོག་པའི་སྟངས་སྟབས་ལྡན་པ། དེ་ལ་ཐུན་མོང་མ་ཡིན་པའི་སྲོལ་རྒྱུན་གྱི་ཁྱད་ཆོས་ཐོན་ཡོད་པས། དེར་ཡོད་སྐུ་མགྲོན་ཀུན་གྱི་ཡིད་ལ་སྨྲ་མི་ཤེས་པའི་དགའ་སྤྲོའི་མེ་ཏོག་བཞད་པར་གྱུར།

དེ་བཞིན་དུ་གཞོན་སྐྱེས་གླུ་མ་གྲགས་ཅན་ཀླུ་མོ་སྐྱིད་ཀྱི་གཟེངས་མཐོ་བའི་གླུ་སྐད་ཀྱིས་བླངས་པའི་ཚེ་རིང་མཚོ་མོ་ཞེས་པའི་པི་ཝང་སྦྲེངས་འདྲའི་ངོ་མཚར་གྱི་གཞས་གདངས་དེར་ས་གནས་རང་གི་ཁྱད་ཆོས་དང་སྒྱུ་རྩལ་གྱི་རྣམ་པས་ཕྱུག་པར་བརྟེན། ལྟད་མོ་བ་རྣམས་ཀྱིས་མཐའ་གཅིག་ཏུ་གདེང་འཇོག་མཐོན་པོ་མཛད།

གཞན་ཡང་མདོ་སྨད་ཡུལ་གྱི་རྡུང་ལེན་མཁན་པོ་དཔལ་མགོན་དང་གླུ་མ་གྲགས་ཅན་འཇིགས་བྱེད་འཚོ། བསང་ཁོག་གི་གཞོན་སྐྱེས་ཕུལ་བྱུང་རྡུང་ལེན་མཁན་སྦྲ་ནག་ཚན་སྡེབ་དང་། ཁོ་ཚེའི་དམངས་ཁྲོད་སྒྱུ་རྩལ་ཚོགས་པ་སོགས་ཀྱིས་བླངས་པའི་ཨེ་མ་ཡང་ཅིག་སོ་ཞེས་པར་དམངས་སྲོལ་གྱི་རང་བཞིན་ལྡན་ཞིང་། སྒྱུ་རྩལ་གྱི་ཉམས་འགྱུར་མངའ་བ། དབྱངས་ལྡན་གྱི་ཡོན་ཏན་རྫོགས་པ་ཤ་སྟག་ཡིན་པའི་ཁྱད་ཆོས་ཐོན་འདུག་པས། ལྟ་མཁན་རྣམས་ཀྱིས་བསྔགས་བརྗོད་ཀྱི་མཐེ་བོང་མཁའ་རུ་བསྒྲེངས་སོང་།

དེ་ནས་བླ་བྲང་དཔོན་ཚང་གར་བརྒྱུད་སྦྱོང་ཁང་གི་གར་མཁན་ཚོས་དམངས་ཁྲོད་ཀྱི་གར་ས་ལེ་མ་ཞེས་པ་འཁྲབ་སྟོན་བྱས་པའི་ལྡེམ་མྱུར་ཅན་གྱི་འཁྲབ་ལུགས་དང་སྙན་དབང་གསོ་བའི་གཞས་གདངས་སྔར་ལས་ཕུན་སུམ་ཚོགས་ཤིང་བྱང་ཆ་ཡོད་པའི་ཁྱད་ཆོས་ཐོན་འདུག་པས། དེར་ཡོད་ཕོ་མོ་རྒན་གཞོན་ཀུན་གྱི་ཡིད་སེམས་དགའ་ནས་འགྲོ་ལྡོག་མི་བྱེད་པར་གྱུར།

དེ་ནས་ཨ་མདོ་ས་ཁུལ་དུ་གྲགས་པ་རྒྱས་པའི་ཐང་དཀར་རོལ་ཚོགས་ཀྱིས་རྡུང་ལེན་བྱས་པའི་ཐང་དཀར་ཞེས་པར་རང་གི་དམིགས་བསལ་གྱི་གདངས་འགྱུར་དང་འཁྲབ་འཁྱེར། སྟངས་སྟབས་བཅས་ཀྱི་སྒེག་ཉམས་ངོ་མཚར་ཆེ་ཕྱིར། དེར་ཡོད་ལྟད་མོ་བ་ཚོར་མཚོན་ན་དགའ་མགུ་ཡི་རང་གི་གནས་ཤིག་ཏུ་གསལ།

གསར་སྐྱེས་གླུ་མ་ཆུང་ཆུང་བསྟན་འཛིན་དབང་མོས་སྙན་མོའི་ངག་གིས་བླངས་པའི་ལོ་སར་བཟང་ཞེས་པའི་རབ་སྙན་གླུ་དབྱངས་ཀྱི་གདངས་དབྱངས་དེས་མི་ཀུན་གྱི་རྣ་ཡི་དབང་བོ་དང་ཡིད་ཀྱི་བརྟན་པ་དབག་མེད་དུ་འཕྲོག་པར་གྱུར།

དེ་བཞིན་དུ་བོད་རང་གི་སྲོལ་རྒྱུན་གྱི་ཁྱད་ཆོས་ཀྱིས་མངོན་པར་ཕྱུག་པའི་འབེལ་དཀར་ལ་ཀུན་གྱིས་དགའ་བའི་ཐལ་མོ་རྡེབ་སྒྲས་ཁེངས་སོང་།

མཐར་འཁྲབ་སྟོན་པ་ཡོངས་ཀྱིས་རང་རང་གི་འཁྲབ་སྟངས་དང་ལུས་ཀྱི་ཉམས་འགྱུར་གྱི་རྩལ་དྲུག་ངོམས་ནས་བླ་བྲང་སྐོར་བྲོ་ཞེས་པའི་སྐོར་བྲོའི་སྟངས་སྟབས་བསྒྱུར་ཏེ་ཀུན་གྱི་མིག་གི་དགའ་སྟོན་དུ་བསྐྲུན་པ་དང་ཆབས་ཅིག 

ལྟ་མཁན་རྣམས་ཀྱིས་རེབ་འདིའི་ཞིང་གྲོང་གི་ལོ་སར་བླ་བྲང་དགྱེས་འཛོམས་ཞེས་པར་བསམ་བློའི་རང་བཞིན་དང་སྒྱུ་རྩལ་གྱི་རང་བཞིན། སྲོལ་རྒྱུན་གྱི་རང་བཞིན། མི་རིགས་ཀྱི་རང་བཞིན་བཅས་ལྡན་འདུག་ཅེས་མགྲིན་པ་གཟེངས་སུ་བཏེགས་ནས་སྨྲའོ། 

སེམས་ཅན་ཀུན་གྱི་སྨོན་པའི་བླ་བྲང་དུ།། 

ལོ་སར་བསུ་བའི་ཞིང་གྲོང་སྤྲོ་ཚོགས་བསྡུས།། 

ངོ་མཚར་ཡིད་འོང་བྲོ་གར་རྩེད་རིག་སོགས།། 

སྐྱེ་དགུའི་ཡིད་དབང་འགུག་པའི་རྒྱན་དུ་གྲུབ།། 

གླུ་བ་གླུ་མའི་མགུལ་གྱི་བུམ་བཟང་ལས།། 

ཐོན་པའི་འགྱུར་བར་སྟོང་གི་དག་གཙང་གླུ།། 

འགྱུར་ཁུགས་རོལ་མོའི་དབྱངས་དང་སྡེབ་པའི་ཚེ།། 

སྙན་དབང་གསོ་བའི་བདུད་རྩིར་གྱུར་འདི་རྨད།།

འཁྲབ་ཞུགས་པ་ཡོངས་ཀྱི་མཉམ་པར།

བསང་ཆུ་རྫོང་རིག་གནས་ཁང་གི་ལས་མི་འགའི་མཉམ་པར།